渝林庭重慶小麵館

營業中

休息中

店面好細嘅一間小店，4-5張枱左右，可以望到入面廚房煮野。閒日晚飯時間唔算多人，但都不斷有人入黎食野同叫外賣。酸菜魚 $178★★★★☆見餐牌酸菜魚冇大細之分，辣度叫左小辣，唔會好辣！見佢最後用熱油淋落啲花椒、乾辣椒，激發啲香味！一開始聞落攻鼻都怕太辣，但食落還好。魚份量幾多，兩個人夠哂食，冇得簡邊隻魚或者去骨，但即使有骨亦唔算太多，偏向大骨。魚塊食落係新鮮，唔會霉同冇腥味，肉質爽口，但滑度比起之前食冇咁滑，但又未到鞋口。湯底唔會好油膩同死咸，個酸味好出色，鍾意食酸嘅唔可以錯過！除左有魚之外，配料仲會有幾條火鍋粉、娃娃菜、醃蘿蔔、酸菜、芽菜，食落幾豐盛。欣賞佢個醃蘿蔔，夠酸得黎仲超爽脆，食左好開胃。另外我地叫左份萵筍加入去，原來係切成條狀，同我預期係一片片有出入，但吸埋啲湯汁，又酸又爽脆，好清爽！涼拌黑木耳 $30★★★☆☆正常普通涼拌小菜，冇咩太特別，普通用麻辣醬拌嘅味道，但覺得個醬唔夠惹味，可能落得太小，木耳夠爽脆！🌟總括：鐘意食酸嘅可以一試酸菜魚，魚夠新鮮，不過就有骨。一份酸菜魚都算夠2個人食，但如果大食D或者男仔就要叫多個小食同埋加飯麵。小食味道就正常。