吉祥冰室 (已結業)

難得入元朗，係屏山地鐵站附近，搵到呢間有特色嘅冰室，就入去食咗個傳統港式下午茶。 從門面，餐廳內部裝修，飾品擺放，到食品嘅種類都深透出濃濃嘅懷舊風情，設計好用心，有唔少特別嘅打卡位。Order咗一樣香港傳統冰室美食—菠蘿油，加呢間冰室招牌大熱「阿華田雪山」。菠蘿油牛油厚薄適中，食完唔會太厭、太有罪惡感。🤪 包嘅溫度適中，入口頭幾啖會食到塊狀牛油，但食到尾牛油融咗，前後有兩種不同嘅口感。「阿華田雪山」有驚喜， 華田底偏淡，加埋五穀麥芽粉，有陣陣麥甜味，味道、口感特別，比一般華田健康。華田底本身凍，五穀麥芽粉未咁快出味，加完粉攪勻等一陣再飲，麥香味會更明顯。