上海珍珍排骨麵 (已結業)

今日九點幾喺元朗搵野食，知道呢間上海麵新開，所以想試下。我地兩個人叫左一個紫菜腐皮排骨麵、一個上海粗炒同一個酥炸雲吞，野飲叫左豆漿同菊花茶。呢個紫菜腐皮排骨麵見佢個紫菜腐皮幾特別所以叫左，但食落覺得紫菜腐皮好多油，同埋無咩紫菜味，但係個排骨就好好味好香，而個麵d 湯都唔會好咸，幾好！我幾中意食。呢個上海粗炒好好食呀！佢無咩油炒得好乾身，又有味道。d 排骨係同上邊果個湯麵一樣既，所以都好好食！ 但係男朋友食就覺得唔係好夠味，佢就加左d 辣醬去食。酥炸雲吞d 料好多，個味道唔錯，都炸得好香口好脆。 好食既！豆漿無咩特別但係個菊花茶好好飲，佢話係自家製既，我都覺得好似屋企煲果d 咁既味，唔會好甜，我好中意。另外，佢個裝修好靚架，睇得出佢係花心思設計過既，令我地食得都好舒服，仲播住我最中意既陳綺貞歌，係得好開心，哈哈！