影片
更多
2008-05-04
52 瀏覽
之前有晚3號風球，又黑雨，但係屋企又無野食，又唔想去太遠地方食野，於是乎係網上面見到呢間「泰馨」私房菜，雖然得一個評語，但係評價唔錯之餘見價錢都相宜，於是乎就膽粗粗去試下。晚上9點半，男朋友開車去，去到附近都幾荒蕪，全部地舖都已經關門，去到附近都覺得似乎唔對路，正準備掉頭之際，發現有「X豐」停車場，記得網上面有提過之餘，斜對面有間只有門牌家住「329」但又無名既地方，出面掛有燈飾，一落車就有人問係咪食野，原來係食客黎既~ 仲教我地泊車去對面個停車場，食完飯後叫佢地蓋印就可以免費泊車，真係好人呢！去到門口，發現門上面無舖名，只得門牌，同埋一個門鐘，門口左手邊有個幾靚既信箱，上面大大隻字寫住329，但係其他就係泰文；最欣賞既係佢地既心思，門口有好多植物，係個信箱下面係個花盆，遠睇以為係另一盆盆栽，點知原來係俾人掉煙灰同煙頭的！我地兩個人order左細既冬蔭公湯$30、釀雞翼兩隻$40 ($20@)、蝦醬炒通菜$30、生蝦6隻$54 ($9@)，呢個係問佢既價錢，不過唔知點解埋單個陣收$160，不過都算好平。第一個到既係冬蔭公湯，本身唔太肚餓既我，一飲之後，都讚不絕口呢！以往飲開既，大部份都
晚上9點半，男朋友開車去，去到附近都幾荒蕪，全部地舖都已經關門，去到附近都覺得似乎唔對路，正準備掉頭之際，發現有「X豐」停車場，記得網上面有提過之餘，斜對面有間只有門牌家住「329」但又無名既地方，出面掛有燈飾，一落車就有人問係咪食野，原來係食客黎既~ 仲教我地泊車去對面個停車場，食完飯後叫佢地蓋印就可以免費泊車，真係好人呢！
去到門口，發現門上面無舖名，只得門牌，同埋一個門鐘，門口左手邊有個幾靚既信箱，上面大大隻字寫住329，但係其他就係泰文；最欣賞既係佢地既心思，門口有好多植物，係個信箱下面係個花盆，遠睇以為係另一盆盆栽，點知原來係俾人掉煙灰同煙頭的！
我地兩個人order左細既冬蔭公湯$30、釀雞翼兩隻$40 ($20@)、蝦醬炒通菜$30、生蝦6隻$54 ($9@)，呢個係問佢既價錢，不過唔知點解埋單個陣收$160，不過都算好平。
第一個到既係冬蔭公湯，本身唔太肚餓既我，一飲之後，都讚不絕口呢！以往飲開既，大部份都係得個辣字，無咩香味；但係呢都真係做到又香又辣呢！再加上入面既大頭蝦有膏之餘，個蝦身仲可以係爽口既！真係好難遇到呢幾樣都做得好既冬蔭公湯呢！最令我難忘既係，飲完d湯之後先食隻蝦，發現有好多好似番茄茸既物體黏住係隻蝦上面，食落口先發現原來係蝦子！我從來都未試過飲冬蔭公湯會有蝦子食，真係一試難忘呢！ 不過如果唔嗜辣既朋友就要諗諗，因為都幾辣呢！
跟住係蝦醬炒通菜，比想像中大碟，蝦醬都好香口，幾好。
再黎係釀雞翼，呢個比想像中無咁好，同埋都幾膩，所以食剩左一隻，打左包拎走~
係咪好想知呢碟係咩黎呢﹖記得我頭先所寫既就知道，佢地係 ----- 生蝦！無錯，呢度既生蝦係連埋個蝦頭炸左先俾你既！唔怪之得要最後先到啦！蝦頭食落口仲係超熱呢！隻隻都有蝦膏，絕不欺場呢！生蝦本身做得幾爽口，個醬汁辣而帶香，如果可以係上面加片生蒜會更香口！ 不過同冬蔭公一樣，唔食得辣既人真係三思，我咁鍾意食辣既人食到第三隻都覺得好辣呢！
總括黎講呢間野又近我，住係元朗或洪水橋附近、或者有車既朋友，值得一試呢！
張貼
