湯•米 (已結業)

前幾日入左將軍澳探朋友，順便一齊食晚飯，大家都想食下台灣菜又想打下邊爐，所以試左呢間餐廳可以一人一鍋。 我地叫左2個鍋，一個招牌臭臭鍋，一個沙茶牛肉鍋，2個鍋既食材都幾多，而且仲可以配飯或粉絲，我地2個都鐘意配粉絲，因為啲粉絲可以索埋啲汁一齊食吖！ 跟住好快就上埋3個小食，我地叫左一份海鮮拼盤、柚子蜜雞翼同麻辣臭豆腐，啲海鮮都幾新鮮，食到有甜味吖。雞翼都炸得幾脆口，但裡面仍然好juicy，配埋柚子蜜，食落都好醒胃。 麻辣臭豆腐我覺得係勾起响台灣街頭食臭豆腐既感覺，一上菜就聞到佢陣獨特既臭豆腐味道，食落口就食到臭豆腐既味道，豆腐面鋪左麻辣椒粉，雖然有啲辣，但辣可以帶出豆腐既香口味道。 食台灣菜無理由唔叫台式飲品，我地叫左滿杯紅柚子同芝士茶王8號，2杯飲品上菜時紅柚子既紅色都幾吸引眼球，飲落去酸味味，好開胃！芝士茶王面頭果層芝士好厚身，仲好濃芝士味，撈埋下面既茶，味道好夾！好好飲！