美心皇宮 (已結業)

裝修後細左一大半，環境都擠迫左。以前勁愛依度既點心，真材實料，依家都免強可以保持啦，都尚算滿意 ~ 都見人手不足，埋單要等好耐，服務態度 OK 啦 ~四寶雞札，雞柳、魚肚、火腿、蘑菇。保持水準，都好滿意，免折大啖啪，食齊四種味道同口感，混合得恰到好處。拆開續一擊破，雞柳滑、味濃又好醃得好入味。魚肚棉滑、吸收晒啲精華，食完再想食。火腿有咸香又爽口。蘑菇味鮮，又可減底油膩感，又健康可減膽固醇。好味 ﹗水晶蝦餃，原隻蝦仁又鮮又爽，適量肥豬肉提升口感同香味，皮薄晶瑩，正 ﹗蟹籽燒賣，食左幾十年燒賣，都係第一次食到真真正正有蟹籽味既燒賣，仲要留係口裡面久久不散。必食，仲要再添食。鳳爪排骨飯，始終酒樓蒸飯不及小飯店。飯較濕、無飯香，排骨味道平平，唔突出，豬肉味淡，另外又醃得唔夠味，唔甜唔香唔滑。鳳爪大路，無特別。最重要係甜豉油，但味淡、唔香，一般。飯必須乾身，仲要用幾種米混合黎煮，每間食肆會有自己秘存既方程式，如果只用單一米煮，永遠都煮得唔會好 ﹗總括黎講，都尚可以啦 ~