BBQ 7080 (已結業)

搭入十點，同朋友兩丁友嚟到山林道嘅7080食韓燒。店鋪好易搵，直行到山林道尾便搵到，門面裝修好特別，入門口要直上二樓先係用餐嘅地方，環境裝修得真係好吸引！韓風味特濃。宵夜時段十點開始，有八折優惠！落單要咗豬腩肉、牛助骨（真係寫牛助⋯唔係個肋字咩？唔考究喇）、仲有鰻魚！仲叫咗支韓國燒酒！未開始燒嘢食之前，店員好細心咁將所有配菜擺好喺檯面！凍豆腐啦、沙律菜、生菜、泡菜⋯全部都可以無限叫！正！五花腩燒出嚟真係好香，雖然係腩位，但一啲都唔覺油膩同肥，相反肉質更香軟！牛助骨就爭啲喇反而，肉質有啲韌，冇乜牛味！建議揀豬食，因為韓國食豬比牛多，豬肉類應該有保證啲。鰻魚！超級讚！唔食唔得！冇得彈！一邊燒一邊用生菜將肉、泡菜包好嚟食，真係一等一享受！韓國燒酒⋯其實真係唔覺得有咩好飲，純粹係諗住玩下韓風，燒酒其實都易飲，但味道就有啲難接受⋯酒精味都幾重！唔係香囉。而且有成17.5%酒精濃度，都幾易飲醉。