WTF (已搬遷) 新店位置

環境5分：正常酒吧格局，有高吧位又有普通餐枱位。樓面好高，有室外座位比人一邊飲嘢一邊抽煙，Ｄ位唔迫，可以畀五分。衛生5分：酒吧嚟講絕對非常衛生，洗手間男女共用，但非常乾淨。室外室內Ｄ枱面同地下都好乾淨，又有紙巾任用，可以畀五分。服務5分：Bartender後生有活力，同生面口或者係熟客仔都咁好傾。自我介紹完又會推介Ｄ雞尾酒，非常詳盡。飲到一半又會走過嚟問有乜意見，滿唔滿意，之後又叫我地星期五再嚟飲過，因為到時夜晚會有人唱live band，畀佢滿分！味道5分：1)      大大杯Peroni意大利生啤又凍又清爽。2)      Bartender力推杯絲綢之路雞尾酒有個精美圖騰酒杯，好靚。杯頂見到好多新鮮紅莓，黑莓同香橙，証明調酒真材實料，另外有塊血橙乾，好有特色同多元化。杯雞尾酒酒精唔濃，好重甜酸嘅熱情果同菠蘿味，好清新。3)      第二杯Smokey Robinson一樣有好多橙，紅莓，黑莓，另外仲加多舊楊桃，全部都好鮮甜，好好食。杯酒個煙味嚟自濃味嘅肉桂香，同個威士忌酒味好夾，誠意加效果足以畀滿分！抵食4分：歡樂時光有八折，每人百幾飲吹個幾鐘頭水，都算ＯＫ抵，可以畀四分。