養心殿台式養生鍋 (已搬遷) 新店位置

為咗捉住冬天的尾巴。就緊係要打返個麻辣邊爐，今次就去咗喺鵝頸橋附近嘅養心殿。去到門口就已經聞到香噴噴嘅香辣味，睇嚟冇去錯地方。鍋底款式數目都算多，而今日就試下個麻辣小辣湯底。小辣嘅材料都唔簡單，成個湯底都係紅卜卜嘅燈籠椒同紫天辣椒，仲有鴨紅，冰豆腐。海鮮拼盤份量唔多，但勝在夠新鮮。活九孔鮑鮮甜，活大海蝦上枱仲郁郁吓，同埋帶子大隻又爽口。手打蟹籽墨魚滑蟹籽鋪滿喺晶瑩剔透嘅墨魚滑上面，食落墨魚味重仲帶少少蟹籽甜味。黑豚梅頭肉片，黑豚梅頭肉嘅肉質爽口，脂肪比較平均。栗米打麻辣邊爐我會比較鍾意打栗米，因為栗米芯吸收到麻辣湯底嘅味道，又唔會影響到栗米原本嘅味道。最緊要係栗米食落，唔會攪到成口湯油，食落健康啲。水晶粉煙煙韌韌嘅水晶粉，加埋麻辣湯底，食到流晒汗，都要堅持，因為太好味啦。