囍 (已結業)

今晚約咗個保險朋友傾保單，平時佢都係孤寒度最多請我食麥當勞，點知今晚佢約我係佢公司樓下打邊爐，心諗佢都應該跑唔到數搵我加大張單，還掂係佢請，我就食咗先算！間邊爐係偉業街同敬業街既轉角位，宏利金融中心一樓，係觀塘站沿開源道向海行一陣就到！入到去見到佢好似唔使錢咁叫咗成十幾碟牛肉，佢仲唔等我食緊添！見到牛肉切得夠薄，放入喜煱燒沙底滾兩滾就食得，放入口唔硬又夠鮮，最重要就係湯底唔會太濃，唔似其他邊爐咁一味太甜搶晒牛肉既味。個保險佬仲博命叫我飲啤酒，雖然任飲但都唔使人出酒你出命，所以借機話出去自助吧拎野食行開下先，自助吧都係正常既丸類菜類，但米線意粉就好有心機用個類似香水樽裝起，真係睇得又食得👍通常食邊爐之後，不外乎係牛記雪糕杯，但呢到就有部自助雪糕機無限食牛奶或綠茶雪糕，仲可以用甜筒裝起，好似以前7-11食雪糕既感覺！牛奶同綠茶我都食過，打完邊爐最好都係食綠茶，夠消滯之餘又唔怕肥！🙏唔經唔覺九十分鐘過去，係時候埋單！原來都係$168加一，咁就真係正過係同區觀塘道某放題大廈既邊爐！最重要有靚靚海景睇！下次帶埋男朋友來食下先！