聖安娜餅屋 (已結業)

去澳門，不期然都會經過呢間聖安娜，聖安娜呢個品牌比我最深刻嘅印象，要算係佢嘅橢圓形蛋撻，同埋佢三十幾年嚟所經歷過嘅風風雨雨，改朝換代，餅咭擠提，到依家仍然喺香港擁有超過50間分店，都算幾硬淨！佢賣嘅嘢都幾多元化，除咗西式麵包、日式麵包、蛋撻、蛋糕、西餅、各種應節食品，好似新年糕點、粽同月餅之外，而家連糯米雞同中式包點都賣埋。反璞歸真，今次要試嘅唔係新嘢，而係佢最經典嘅橢圓形蛋撻： 蛋撻：橢圓形嘅外型依舊醒目吸引，不過個蛋撻攞上手，真係感覺唔到一絲餘溫，完全係凍嘅！ 蛋身質感好挺，蛋味夠晒濃郁，味道亦唔會太甜，曲奇皮幾薄，唔油膩但帶陣陣香濃牛油味，而且好夠脆！ 白汁磨菇酥：未食已經好吸引，賣相好靚，攞上手仲有少少熱，酥皮焗得唔錯，一層層分佈得好細緻，質感鬆化，內裏嘅芝士頗多而且呈半融狀態，再配上磨菇嘅濃香，食落又香又軟，值得一試！呢間聖安娜嘅裝修典雅，燈光柔和，店員態度友善，而且出品賣相食味亦不俗，惟一要改善嘅就係出品溫度嘅控制，始終麵包蛋撻之類係熱先會最好食！