燕萍越南餐廳 (已結業)

　　以前都去過「燕萍」幾次，亦都去過佢新開o既「清亭」(詳情可以留意小王子另一食評)。今次去「燕萍」除o左食牛油炸雞翼外，更加第一次試食「鴨仔蛋」。　　今次同朋友仔一齊去，一行三人，我就食o左「生牛肉河」，睇住D 生牛肉片慢慢俾熱湯浸熟，愈睇愈過癮。牛肉依然敕、河粉依然滑、湯依然清，三者配合得恰到好處。　　另外叫o左「牛油炸雞翼」、「豬頸肉」、「春卷」以及「鴨仔蛋」。牛油炸雞翼最緊要趁熱食，要享受雞翼o既熱油o係口中爆發o既一刻，如果凍o左，味道起碼少一半分。豬頸肉燒得較焦，但入口又唔係太乾身，最鍾意佢D ，比其他食肆o既豬頸肉汁多好多青檸味，入口一刻精神為之一振。春卷就比較普通。　　第一次食鴨仔蛋，有D 緊張，入口無想像中核突，蛋內的汁液只有淡淡的蛋黃味道，原來「鴨仔」只有茶匙般大小，但已可辨認出鴨仔o既頭、翼、眼等器官，仲有少少毛o添。一啖入口，鴨仔無乜味，感覺好似食緊「九肚魚」，尤其咬落魚骨的感覺。原來食鴨仔蛋同食普通蛋差唔多，只不過多o左一隻「鴨仔」，未試過o既可以一試。