豊勝手丼 (已搬遷) 新店位置

已經係第4次嚟食，次次都好滿意，而且佢哋定期會加新菜色，值得隔一排又嚟食！北海蟹丼 ($198)賣相好吸引，鍾意蟹嘅應該會開心到癲咗，有松葉蟹肉、2隻松葉蟹腳、2隻松葉蟹鉗、味噌蟹膏及蟹籽。就算係蟹鉗都已經整好晒，基本上唔洗出手都可以食到啖啖肉又唔會浪費半絲蟹肉！味道鮮甜而且口感係一梳梳咁，非常新鮮。花咗啲時間將全部撈埋一齊食，非常滿足！五品丼 ($268)有三文魚、油甘魚、牡丹蝦、活帶子及日本海膽。全部刺身都好新鮮肥美，肉質甘甜；比較突出嘅係牡丹蝦，超大隻勁新鮮，肉質好嫩滑彈牙，食埋蝦頭入面啲膏，香甜無比！兩塊帶子中間夾咗塊檸檬片，必少少檸檬汁出嚟一齊食，鮮甜味道更突出；由於太肚餓嘅關係，啲日本飯香又綿密，所以一定要添飯！海膽係就係好香濃，不過叫多咗飯，如果海膽份量再多啲就完美啦，而家唔夠撈晒啲飯呀哈哈！次次嚟都冇失望，春天又嚟食喇！