明閣 (香港康得思酒店)

近排不少酒店餐廳都推出優惠，係個好機會試吓米芝蓮得獎嘅餐廳。今次就試吓朗豪坊隔離嘅康得思酒店中菜「明閣」。第一印象真係麻麻哋。因為喺餐廳櫃檯確認訂位時，職員竟然話冇我嘅訂位資料，真係O晒嘴。幸好職員都即時安排到枱俾我......環境寧靜，枱與枱之間都唔會好迫。至尊蜜汁叉燒我覺得叉燒嘅品質係分別中菜餐廳級數嘅指標，所以第一時間叫碟叉燒。一碟叉燒都有十幾舊，幾抵食。舊舊都係半肥瘦，口感鬆軟，蜜汁味足夠。係高級嘅叉燒呀！如果再燒得香口啲就仲好食啦！鮑魚雞粒酥皮撻，必食之選！鮑魚炆得夠林，撻入面有小雞粒同埋蠔油醬。酥皮好香好鬆化。成個撻食口感好豐富，一啲都唔乾。超好食！瑤柱鮮蝦燒賣真材實料有原隻大蝦，質地紮實。但味道沒有太大驚喜。鮑魚淮山雞扎清新之選，用黃芽白包住鮑魚條、雞肉、淮山片。材料新鮮，唔油膩，但味道較淡。總括而言，合適價錢、寧靜環境、真材實料的食物。唔係最最最高級嘅酒店式享受，但想舒舒服服同屋企人食餐飯，明閣都係唔錯嘅選擇。