施心畢老撾餐廳

營業中

休息中

大少今日同我食團年飯，我哋去咗食老撾菜。呢一間鋪頭，大少同我都未曾食過。大少叫咗老撾肉碎太陽見求，見求原來即係紫米加白飯，再配龍眼梳打水。老撾肉碎太陽蛋飯，我見同泰式肉碎飯差不多，都係用肉碎，九層塔同蒜頭一齊落去炒，不過就冇辣味，同埋多咗隻荷包蛋。大少話個餐好好食，唔知係咪大少肚餓嘅關係，佢覺得個餐份量好少，唔係好夠飽。龍眼梳打水，用罐頭龍眼加梳打水，冇加糖漿，味道唔係太甜。我就叫咗牛肉老撾湯粉配南薑香茅茶。我叫咗湯粉扣抵，所以張相睇落去，份量唔係太多。我自己覺得個湯底偏鹹，但係大少話湯粉應該係咁。個老撾湯粉有少少似幼米線。大少個龍眼梳打水一啲都唔甜，反而我個南薑香茅茶就係甜嘅。我個茶，南薑味同埋香茅味都唔係好夠。我唯有當泰國花茶咁飲。我哋仲加咗是拉差牛油雞翼。個是拉差牛油雞翼望落去橙橙地，應該係攞是垃差醬去煮。食落去食到有啲辣味，但係又唔係是拉差醬啲味，味道有啲似buffalo wings. 雖然冇乜是拉差味，但大少同我都覺得好好食。雖然我哋嘅食物唔係真係10分好食，但係我同大少都食得好開心，有少少驚喜，所以我決定比好評。