初心冰室 (已結業)

一朝早做完運動，午餐都想食得豐富啲。於是諗起之前嚟過呢間初心冰室，佢嘅鵝肝拼牛柳，比起好多食牛扒嘅餐廳都仲要出色，於是乎心思思又再嚟食。今日有啲肚餓，於是乎同女朋友兩個人叫咗兩個午餐，再加多一個鵝肝拼牛柳。自己好鍾意食酸野，飲親通常都係羅宋湯，貪佢有啲菜又有少少酸味係一個開胃嘅選擇。鵝肝拼牛柳好快就上枱，見到個鵝肝煎到脆卜卜咁，一切落去就覺得外脆內軟，好想一啖放入口度食。果然冇令人失望，鵝肝嘅油脂浸透整個口腔，油香久久不散。而牛柳亦都係煎到外面脆，而裏面係粉紅色嘅肉，五成熟剛剛好，完全唔會太生或者太老。呢個咁美味嘅鵝肝拼牛柳都只係$138 ，真係好抵食架。另外個午餐雞扒拼薯菜都好好味，個雞皮煎到脆卜卜，一向都唔食海南雞雞皮的我都忍唔住食咗三份一塊皮。最後飲咗個雪糕朱古力咖啡，雪糕裏面有朱古力碎配合咖啡嘅香味，又係一令人滿足嘅午餐。