街坊Cafe (已結業)

星期日經過見到外牆特別！而且石燒牛扒午餐都只不過係$70樓下，所以就試一試！一入到去就聞到一陣陣燒牛味，令你食慾大增！大佬叫咗個石燒牛肩肉午餐，牛肩肉2舊用熱石板上，上時牛肉面已經燒好，裡面仲係生嘅，所以生熟程度可以自己一手一腳決定。肉味都算香濃，跟白飯一個，冇任何醬汁提供，感覺比較dry，不過肉質就夠juicy 搭夠。跟餐仲有是日餐湯-南瓜湯，本身我同大佬都唔好南瓜類食品，見餐牌話可以加錢轉龍蝦湯，可惜當日冇供應。飲落一般都滑，冇渣同完全冇加cream 或奶類落湯，可能喜歡南瓜嘅朋友會喜歡啩！份量方面對於女士嚟講應該都適中，但係男士嘅話就一定唔足夠，大佬都話好似冇食過嘢落肚。我就叫咗一個豬頸肉叻沙，只有米線，唔同一般係米粉混油麵，而且嚟到時啲米線好硬，相信唔太熟，有啲失望，反而豬頸肉有驚喜，大大舊都有成4件，件件都好厚，口感爽口十足，面有煎過嘅味道。配菜有一貫嘅芽菜、豆卜，仲有油菜同蟹柳2條，湯味道似沙嗲湯多過叻沙，勝在夠濃。份量都係嗰句，女士係啱啱好。跟午餐當然有餐茶，一般貨式。服務都算唔錯，感覺良好。坐位都算唔太密集。通風都可以嘅，食完都係會有油煙味跟住你。