築地EbiKin拉麵 (已結業)

本來想去蘇豪食越南粉，點知撞正公司高層，薯蓉隊長為免食到周身唔志在，於是行落d繼續搵食，見到對面馬路有間紅噹噹既餐廳，好搶眼，於是衝左入去食。被安排坐係bar檯，見到眼前有幾棵寫住「博多蔥」，咦！叫個香蔥拉麵先，本來想食豬骨湯拉麵，不過落單時，侍應講左句「我地呢到出名食蝦湯，要唔要試下？」好啦，轉駄食蝦湯！碗麵一放係面前已經聞到好大陣蝦味，而且碗麵比我想像中多蔥，鍾意食蔥既就覺得好正，因為可以啖啖湯都有蔥，飲一啖湯，入口已經好大陣蝦味，不過佢就唔係濃湯果種好杰身既質地，所以雖然第一啖好濃蝦味，過左陣已經好似無晒味。要讚一讚個麵，我揀左普通麵身，煮得剛好，唔好過硬/太軟，而且無皂水味（係呀，試過食一碗勁種皂水味既日本拉麵😰）同埋佢個湯都唔係好油，唔會食完好滯。原來佢有杯麵出，不過唔知香港店有無得賣呢？