餃里 (悅湖商場) (裝修中)

呢間喺湖山新開嘅餃子外賣店，我已經唔係第一次幫襯，上次經外賣APP買煮好嘅用Lunch覺得好好食，今晚一於外賣生餃返屋企打邊爐俾屋企人試吓！舖仔細細但入面都好多姐姐喺度密密手包新鮮餃子，三點幾嚟到都幾多人幫襯吓，我柯打咗三拉生餃，大概等咗5分鐘左右，都好快手！包裝好精美，啲餃一粒一格，亦落咗好粉喺盒入面，所以啲餃唔會黏埋一整，好方便處理。【椰菜鮮肉餃】呢間啲餃大大粒，全部都好飽滿，真係做到「皮薄餡靚」！啲餡亦好足料，新鮮爽甜嘅椰菜同豬肉好爽，真係餃子中實冇死嘅穩陣基本款，人人都啱食之選！【泡菜鮮肉餃】泡菜款都係店家嘅推薦，我曾經都買過急凍嘅韓國貨打邊爐，不過買過幾個牌子嘅急凍餃都十分容易散開，搞到啲餃子皮黏底好煩。但呢間啲餃完全唔會散，掂呀！泡菜餃酸酸辡辡好好食！泡菜份量都幾多，好足料！【咖喱鮮肉餃】咖哩餃嘅咖哩係港式口味，原來以為阿爸會比較鍾意傳統嘅椰菜餃，點知佢大讚呢款咖哩餃喎，哈哈！三款餃各有特別，食多啲都唔會悶。其實佢有款芝士栗米餃都超好食，不過比較適合煎嘅，今次係打邊爐都冇買到。另外，佢啲辣菜甫都相當好食，都幾辣㗎！