Oslo (已結業)

本來同好友想去食意大利嘢嘅，去到竟然冇開門（明明OpenRice寫住開架嘛😤😤），因為天氣實在太熱，唔想係條街度再逛，逐去隔兩條街嘅Oslo試吓。蒜香欖油雞肉炒意粉好友話呢個意粉一般啦，茶記風味，雞肉唔算鞋口，但意粉唔夠彈牙。夏威夷丹麥酥pizza個名話就話係Pizza，其實係由兩塊丹麥多士拼埋而成，上面鋪咗少許煙肉同菠蘿。塊多士焗得幾脆口嘅，其他配料都係茶餐廳嘅格局，不外如是。炸洋蔥圈呢個洋蔥圈炸得唔夠酥脆，比較淋身，再脆口啲會好一點。曲奇奶昔呢杯曲奇奶昔，雖然面頭舖咗唔少曲奇碎同埋少許可可脆波，但杯奶昔其實好稀，打得唔夠厚，唔夠香濃。而好友叫嘅飲品青蘋果梳打，真係唔好飲，所以相都冇影🤣🤣。總括嚟講呢間Cafe雖然外貌同裝飾頗有歐陸風格，但食物質素同一般茶記無異。