紅磡冰室 (已結業)

上個星期食完烤肉之後即刻生咗幾粒瘡瘡，呢兩日都要忍一忍口，唔好食咁多熱氣肥膩嘢，於是今日就揀咗個泡飯嚟食，貪佢清清哋。呢個冰室海鮮泡飯係令猴子有啲驚喜，因為佢材料十足，食材舖滿一個湯碗，大大隻蝦碌、厚厚嘅魚塊，食材全部打孖上，一啲都唔孤寒。湯飯亦係煮得啱啱好，飯粒唔爛、夠結實，湯底亦清新冇味精，食完唔會口乾。其他材料仲有魷魚、淡菜同金菇等等，全部煮得頗有水準。猴子發覺呢間冰室嘅菜色都係偏向少油少鹽，公司同事叫咗個乾炒牛河，睇得出佢用油嘅份量比一般餐廳少，唔會食到成個嘴都係油，食開濃味嘅人或者會有啲唔慣，不過家陣啲人注重健康，相信呢間冰室只係順應潮流。