Villa Villa

營業中

休息中

最近同朋友去咗北角嘅 Villa Villa 食晚餐，試咗佢哋嘅季節限定二人餐，整體嚟講令人滿意，價錢又唔算貴，值得推介俾大家。首先嚟嘅係餐湯同前菜鵝肝多士，升級咗做龍蝦湯，攪拌飲又creamy又有龍蝦鮮味。前菜法國鵝肝配自家製墨魚汁麵包，鵝肝真係油香四溢，再配埋黑醋汁，口感好rich又可以中和油脂感，配搭嘅墨魚汁麵包喺餐廳自家製，沾到油香令麵包更加香口。北海道帆立貝配低溫慢煮美國特級肉眼，餐廳好貼心咁切好咗，再加上北海道帆立貝同蒜蓉汁。肉眼扒好大塊，肉質肥美而且軟腍，配埋柚子醋沙律同翠玉瓜，清新得嚟又唔會太heavy。蒜香銀魚蓉蜆肉意粉，蜆肉真係好多好足料，同意粉嘅份量接近一比一。甜品軟心朱古力馬卡龍，又係餐廳自家製，朱古力味濃郁，馬卡龍外層酥軟。餐廳仲做緊週年優惠，飲品同蛋糕都有discount，不過第二朝要返早所以冇叫到嘢飲。