我的意大利廚房 (已結業)

今日過開灣仔做嘢，就搵埋兩個喺灣仔返工嘅朋友食飯，朋友負責訂枱，就揀咗呢間意大利餐廳，環境唔錯，好適合三五知己傾吓偈。佢每一個lunch set都只不過係百零蚊，以呢區來講再加埋呢間餐廳嘅質素，真係幾超值，性價比相當高。呢度嘅餐包份量好多，而且佢唔係配牛油，而係配蒜蓉同埋芝士粉，我第一次食呢個配搭，新穎得嚟又幾夾，估唔到餐包就已經咁有驚喜！唔同嘅餐就配唔同嘅湯，分別有蔬菜湯同埋雜菌湯。兩個湯都份量十足，而且仲好香濃，非常醒胃。薄薄嘅薄餅餅底上面鋪上南瓜片、香葉、蕃茄醬同埋芝士，因為夠哂正宗，就算冇肉都覺得好好味！牛扒好大塊，肉質非常嫩滑，再配埋大量嘅沙律菜同埋少少薯條，我覺得呢個配搭都幾健康！呢個忌廉汁尖通粉味道比較簡單，忌廉汁好香好滑，而且佢嘅濃杰度啱啱好，所以每條通粉上面都可以掛滿忌廉汁，正！最後配埋一杯冰凍嘅檸檬茶同埋小小嘅甜品，最緊要就係可以同埋朋友一齊開懷暢飲一餐，真係大滿足！