十三少 (已結業)

最近見到好多媒體介紹「十三少」嘅酸菜魚，趁週末唔使返工，專登去試下。原來餐廳喺港九新界都有分店，真係「區區有魚食」，今次就揀咗嚟堅尼地城呢間。門面很別致，古色古香，流露出濃濃嘅中國風。店內設計亦很有特色，睇得出餐廳無論喺設計同佈置方面都下咗唔少功夫，融入了許多傳統嘅文化元素。除咗主打嘅酸菜魚外，其實餐廳仲有唔少經典熱菜、麻辣乾鍋、醬香鍋、小吃、主食及甜品等供應，選擇好豐富。我哋點咗涼拌土豆絲、酸菜魚、乾煸四季豆同紅糖糍粑。薯仔絲好爽身，薯味清甜，入口清新爽脆，一點也不油膩，好啱夏天享用。熱賣嘅酸菜魚接著送上，嘩！勁大份，除咗魚肉外，碟內還放入了不少酸菜、萵筍、菇片和白蘿蔔，用料十足。魚肉以新鮮鱸魚切片煮成，大件又厚身，細骨唔多，嫩滑又有彈性，完全無腥味。酸菜好醒神，又酸又麻，但食落一點也不死辣，配上鱸魚骨湯，集鮮、酸、辣、香於一身。四季豆可以自選辣度，我哋揀咗小辣，啲豆炒得夠晒火喉，鑊氣十足，入口乾身不油，爽脆又無渣，夾埋啲肉碎一齊食，味道一流！紅糖糍粑亦做得很不錯，糯米外層炸得好香口，食落外脆內軟，面頭灑咗一層黄豆粉，再配上秘制嘅黑糖，入口甜絲絲，用嚟做飯後甜品就最適合不過。