麵鮮醬油房周月 (歌賦街)

營業中

休息中

咁多種麵派中特愛沾麵，其中以台風為心中第一，食過幾間出名嘅都係不外其是。同事知道我喜好，中午專程帶我去呢間十年老店一嚐，傳說中嘅排隊人氣麵店，好在我地提前於12點前到達，未幾已經全數滿座。沾麵分為常規同燒黑豚兩種，有辣與唔辣選擇；另外亦有拉麵以及限定撈麵。比較貼心係麵店會提供髮圈同圍肩，等大家食得投入同時又唔會整污糟頭髮或衣物。落單後大約5-8分鐘，一碗熱騰騰嘅沾汁就上枱喇～麵條可以選擇涼或熱麵，個人推薦涼麵，沾汁後溫度恰到好處，入口不燙嘴，軟硬適中略帶韌勁。湯汁濃度中等，帶香辛風味，無彩同海老名果個咁濃鹹；揀燒黑豚就會多三塊肉，黑豚結實鬆化，脂肪位置燒成香脆，逼去油脂，口感香而不韌，無諗過肥瘦相間嘅肉可以燒出瘦肉嘅質感。湯料有幾舊豚肉、芽菜同筍片，筍片切成方厚形狀，食落爽之餘更能品嚐到纖維感；豚肉同燒製嘅完全唔同，稔軟嫩滑。朋友揀嘅香蔥拉麵，蔥花量唔算誇張，但相信有蔥嘅青草香襯托，味道應該都唔錯。