鮨和居食屋 (已結業)

今日朋友帶我去永光中心7樓鮨和居食屋午餐。店細細間充滿日本居酒屋的情調，是和親友飯聚享受日本美食的好地方。我們今日中午一時到店，差不多已全場滿座，好彩朋友已預早訂位。午市套餐選擇多，有午市刺身定食和午市和食定食。豐儉由人，抵食好食。見到好多人食刺身定食，便叫了份鮨和午市套餐($178)。好豐富，有四款時令壽司，迷你海膽杯，串燒兩串和熱烏冬。時令壽司好味道，壽司調味得宜，師傅握壽司手勢好，魚生鮮甜新鮮，魚，蝦，三文魚等都好正。紫菜包住壽司吃更美味。迷你海膽杯少食多滋味，海膽甜，配埋三文魚籽和吞拿魚碎更有口感。串燒牛和豬新鮮熱辣，入口肥瘦得宜有肉香。熱烏冬好滑，加埋菠菜好味。䐁肉生姜燒定食($98)都有水準。䐁肉量多味道美，調味佳，飯有飯味，椰菜絲，青瓜和番茄都新鮮。每個餐包沙律，味噌湯，和風蒸蛋，漬物，飲品/雪糕。蒸蛋好正，蛋香，內有白果，百合，魚蛋等。麵豉湯夠熱。沙律新鮮。紅豆雪糕和柚子茶都好。埋單兩個人$300左右，超值。店員友善有效率。下次再來。