醉忘魚屋 (已結業)

附近最近新開左間日本餐廳，我最喜歡試新嘢，今日終於有機會上黎試試。餐廳採用日式居酒屋設計，全店擺滿日本清酒同Whiskey，相信係收工飯聚好地方。放飯時間午市定食有好幾款選擇，餐廳推薦佢哋採用高級新鮮食材，同時供應幾間米芝連餐廳，一於揀居酒屋既靈魂壽司黎食。醉忘精選10貫壽司配烏冬 $198呢份午餐有齊壽司、前菜、沙律、味噌湯仲有烏冬。份量十足之餘而且賣相相當吸睛，男士一樣夠晒飽。野菜沙律非常醒胃，沙律菜新鮮，當中有我喜歡的牛油菜。前菜係帶子群邊，口感非常爽，加上微辣感覺更冶味。壽司就最容易睇到師傅既刀工，呢份10貫壽司就睇得一清二楚。拖羅係非常鮮味，肉質幼嫩，肥美均勻，入口即溶。油甘魚鮮甜味美，盡顯師傅刀工，厚薄均勻之外仲有錭花紋，油脂跟壽司飯的醋味是很要好的朋友，是我推介的項目，沒有之一。金目鯛魚壽司連上側邊的魚皮，顏色鮮艷，口感爽脆中帶點煙靭。烏冬簡單配上海帶已經相當好味，天然味道連調味料都唔需要落呀。