CEO Neway (已結業)

好耐都無去過銅鑼灣CEO唱K，於是趁星期五放假去唱K，兼食埋午餐。有9款選擇，我就揀咗粟米火腿肉粒意大利粉$105，朋友揀咗紅酒燴牛肉配白飯$105，餐飲一杯，我哋都叫咗熱檸水。大約等咗15分鐘，午餐就送到入房，於是大家都趁熱開始食。我叫嘅意大利粉味道都算唔錯，分量亦啱啱好，如果粟米粒可以加多少少，就會更加好食啦。而朋友叫嘅紅酒燴牛肉，無論睇或食，都覺得比較油，牛肉亦比較韌，好彩味道唔會太鹹，白飯亦都煮得唔錯，唔會太軟或太硬。今次叫嘅兩個餐都算可以，不過比起以前嘅食物質素就真係差咗少少，亦無奉送餐湯，幸好員工服務態度及房間設備都算好，收費平均每人$115.5，可以由早上10：30，唱到下晝3點，都算抵食抵玩。