双囍冰室

營業中

休息中

大熱天時，無咩胃口，想食d輕食，想起雙喜，雖然服務態度出名差，但好就一餐，唔好都係一餐啫，算啦，照去。平日的午餐，前廳已爆滿，行入後廳，叫天不應，叫地不聞，結果行番出前廳，經過水吧個阿姑，佢用查問的語氣問：你幾位呀？一位，坐個度啦！ 心想，唉，阿姑，幫襯你食個lunch都俾你呼喝，真無癮。查實呢位似係老闆娘的阿姑，自己係咪覺得咁好威呢，而完全唔明白客人會反感？ 可能生意好，個人就囂張d啦。大人不記小人過，照食。叫左肉醬厚多士、咖啡，以前雙喜出品幾唔錯，先包容佢服務態度差，但今次真係唔得。厚多士，最後製作出來的效果只是一件厚嘅白麵包，上面加左肉醬，麵包完全無烘過！肉醬的確係肉醬，可惜烘完的肉醬只得表面芝士緊緊熔，食落肉醬係凍嘅，當沙律食咩，令人更加無胃口！身處惡人谷，無謂叫人換啦，留番啖氣好過，無下次。