有蒸氣 海鮮石鍋專門店 (已結業)

同男友慶祝週年紀念，佢話要帶我食我最鍾意的蒸氣海鮮，我期待咗呢餐好耐，果然佢都無令我失望。我一向都好鍾意食龍蝦，所以我地就揀咗呢個「龍蝦海鮮餐」黎食。我做足功課先黎，知道呢間餐廳的黑松露蒸蛋好出夠，所以點咗黎試下。個蛋真係蒸得好滑，蛋漿打得均勻，唔會食到蛋白係中間，加上小小的黑松露係蛋面上調香，松露香味四溢。頭盤係我最喜愛的龍蝦，就咁蒜蓉清蒸已經好鮮甜，蝦肉結實有彈力。挑開裡面都有驚喜，入面有點點蝦膏令人唾涎欲滴。紐西蘭蟶子同樣係我最愛，好大一隻蟶子，加咗小小蒜同埋粉絲，更加特出到佢既鮮味。蟶子飽滿多肉，清蒸最能食出鮮味。南非鮑魚加上蟲草花一齊蒸，蟲草花作用同陳皮一樣可以為鮑魚提升佢既味道，最重意係蟲草花唔會好似陳皮咁搶咗鮮味，不錯。薑蔥蒸海班片，魚肉夠滑，最喜愛食海班的魚皮，充滿骨膠原！粥底選了南瓜排骨粥，吸收晒海鮮的精華，食落有淡淡排骨肉香，為呢個晚餐作結，非常滿足。