爆丼屋 (已搬遷) 新店位置

食完飯係MK蒲咗一陣，行行下見到朋友介紹嘅爆丼屋。想成為日本妹嘅我決定買外賣返屋企，順便孝敬下老豆老母。希望佢地唔好成日鬧我。佢地做緊外賣八折。松葉蟹丼 ($275x80%)諗唔到食咩，所以叫店員介紹嘅個冬季限定俾我，限定當然要試。望落勁高級，成個外賣碗圍滿曬松葉蟹腳、蟹鉗，好豐盛！又有蟹腳又有蟹爪，食落有淡淡嘅香味！中間仲有啲吞拿魚蓉同蟹肉添，足料！鵝肝海鮮盛丼 ($248x80%)呢個我兩年前生日食過。嗰時仲有生日優惠，差唔多成間舖啲人都同一日生日。除咗鵝肝之外，仲有墨魚籽、帆立貝、海膽、蛋。數一數居然有成12粒帆立貝，少少癲，仲好鮮甜添。肥美嘅鵝肝好入口好香濃，仲有隻生蛋可以撈飯食。汽水x2 ($0)有選擇困難症嘅我連食咩汽水都諗咗好耐，無奈。我自己唔飲汽水，我媽有啲肥都係叫Coke Zero俾佢算。麵豉湯x2 ($0)勁香，搭巴士嗰時係咁聞到啲香味，勁想返啲返到屋企飲。味道濃郁，仲有好多蘿蔔同少少三文魚，正。