漢拏山烤肉 (已結業)

今日又即興走嚟銅鑼灣食韓定食啦！唔駛等位真的好！！時間關係，所以唔可能揀燒烤餐，令有選擇困難症嘅我能夠快D決定食咩！8選1決定要4號仔"大醬湯"。lunch set 包括有3前菜，1沙律，1蒸蛋，1飯，1主菜，如果主菜唔係湯類，仲會好貼心咁配番個清湯比你。眼見同事嘅7號同8號都出晒場，但我個4號遲遲未出現，D口水真係流出嚟咁滯呀！所以偷食同事一件白切肉，豬腩肉煮熟後再煎香表面，肥瘦均混，香口美味。等咗大約15分鐘，我嘅熱辣辣大醬終於出現啦！前菜－茄子清甜軟腍，芽菜爽口，泡菜爽胞唔太辣。蒸蛋雖然唔係好滑，但味道不錯。大醬湯嘅雞蛋係比你自己打落去嘅，想打散還是原隻半熟蛋就悉隨尊便啦！大醬湯咸淡適中，帶有少少辣味。湯料有硬豆腐，翠肉瓜，洋蔥，蘿白，牛肋肉碎，味道清甜香口。白飯面灑有點點紫菜同芝麻，配埋大醬湯食更加惹味。