一漁外賣壽司 (已結業)

年近歲晚疫情轉趨嚴重，保障自身安全加上又嚟冇晚市堂食，相信買外賣然後返屋企慢慢食，確實不二之選。行經呢間位於天水圍的「一漁外賣壽司」，見佢都乾淨衞生，十分企理。於是即管睇吓佢個餐牌啦。估唔到呢間外賣店食物選擇好多，除了壽司刺身，更有飯丼、鳥冬、及各種不同小食等等。而且最緊要係，目測店鋪壽司吾係一早整定，而係即叫即做，更加感覺良好。至於價錢方面都很大衆化，以外賣壽司來說性價比十分高。立即決定一於試吓，最後點了一件火之戀壽司，另加七款壽司及兩款軍艦，共19件壽司埋單總數只係$170，計落平均一件都唔使十蚊，認真抵食。我最愛油甘魚，所以一次過試晒油甘魚及油甘魚腩，魚腩特別肥美，十分鮮甜。另一本人至愛，係炙燒左口魚壽司，經火炙燒過魚油香更突出，一啖放入口，滿口魚油甘甜，真係齒頰留香。呢兩款特別推介要試。整體壽司全部都賣相不錯，而且都新鮮大件，抵食又好味。大家有機會要去試吓啦。