HABO室內釣蝦場

營業中

休息中

自問冇耐性, 今晚竟然比丫妹捉去陪釣蝦, 好彩係室內有冷氣, 釣蝦後可以即場加工即食, 為目標而去, 當鍛鍊自己耐性。餐廳環境開揚, 設兩個大水池, 環境清潔唔會有臭腥味。旁邊設少量堂食座位。價錢以每小時計, 初體驗嘗試玩一個鐘, 每位入座起計 (HK$140/小時)入場會供應每位少量蝦乾作鉺同埋釣杆, 仲教埋釣蝦技巧, 絕對容易HANDLE 個蝦池其實好黑, 唔多睇到入面嘅蝦, 冇耐性嘅我原本正質疑入面有冇蝦, 但旁邊嘅人都大有收穫, 而店員每隔20分鐘左右就會加蝦。當自己成功釣到第一隻蝦, 真係好有滿足感!! 所供應嘅都係大頭蝦, 既新鮮又肥美。準時地店員就會協助收集每位成功釣到嘅蝦, 可以自選打包/即場加工,我地就揀咗其中嘅招牌口味---秘製蒜香醬油每隻蝦平均被醬汁包裹著, 味道濃郁香甜, 甜中帶少少鹹香, 蝦頭內嘅蝦膏味道鮮味回甘, 蝦肉爽口彈牙, 鮮甜味十足, 配上醬汁, 惹味非常!臨走前好奇問過店長, 每位價錢原來basic會包五隻蝦, 就算最後失敗冇收穫, 都總算體驗過, 同埋至少有五隻蝦食下。