Running 燒 (已結業)

想食燒肉但又想食小食麵食，於是就嚟左Running燒，一出𨋢就係餐廳範圍，K Pop音樂一直播住，環境都唔錯，唯一就地下唔太乾淨，地下有啲黏。食物種類都唔少，肉既質量都唔錯，推介大家食薄切西冷牛扒，肉質鮮嫩，牛味濃，加埋預設既醬汁食幾好味。除左肉類，仲有海鮮食，不過以呢間價錢黎講，有海鮮已經係驚喜，扇貝幾厚肉味道唔錯，但整體而言，店舖嘅海鮮唔太新鮮，生蠔唔新鮮嘅情況較為嚴重。小食方面，我哋試左炸魷魚鬚同埋炸雞，魷魚鬚有椒鹽味，幾香脆彈牙，而炸雞就有原味、辣味、柚子味，柚子醬酸甜開胃，幾特別。另外，令我最滿意嘅係熟食，炒粉絲份量正常，唔會太多，味道都真係好似係韓國食到既味道。熟食入面，我最鍾意嘅係餐廳嘅水冷麵，麵質超彈牙，湯汁入面既冰都有味，唔係純粹用水造嘅冰，麵上面嘅酸菜又好開胃，整體呢個麵俾人好清新嘅感覺，推介！仲有其他比較特別嘅小食有無骨鳳爪，不過個人就覺得有少少太甜，不過味道都係唔錯嘅，個辣仲好過癮。