又一間餐室 (已結業)

今日喺美孚食飯，行到去寶輪街曼克頓山商場附近，見到呢間餐廳入面坐滿人，而且裝修幾靚，於是入去試下。 當時係中午時間，所以需要同其他人搭枱，餐牌有幾款唔同嘅午市套餐可以選擇，我揀咗一個大豬扒飯。 喺等飯度嘅途中，觀察咗餐廳內嘅一啲裝修，對住寶輪街嗰邊係比較西式嘅裝修，但行入少少嘅位係比較日式嘅裝修。 等咗大約五分鐘，有個沙律送上，有水果同埋有唔同嘅菜，味道正常。 再等多五分鐘，個大豬扒飯終於送上，外加一個蒜蓉汁，仲有隻太陽蛋，豬扒分量係幾大，而且肉質都新鮮，煎得幾香，個飯同個汁就不過不失，整體感覺正常。