江戶前日本料理 (已結業)

大約兩個禮拜之前，有個朋友搵我食飯。二話不說就黎呢度食，其實我都想黎食。只係搵唔到機會而已。聽佢講，呢度野食都幾抵，三、四十蚊就有一個lunch。應該都幾抵既，不過點幾鐘餐廳都係坐唔滿既。三文魚壽司跟餐加5蚊有兩件既，三文魚都算幾新鮮，好有鮮味。但最敗筆既係，個壽司飯係暖既，而且一食就散左。唔算太好食，但5蚊2件仲可以有乜要求呀。咖喱吉列豬扒飯一見到個飯，就覺得汁唔夠撈飯。結果就真係出現左呢個情況。個飯都算幾煙韌，而且個份量真係幾多。而個咖喱汁就唔算太辛口，似番日式咖喱既味道。就係個飯既份量太多，而顯得豬扒既份量好少。而豬扒都幾好食，肉質唔太韌。而個炸粉唔太多，都算係幾好食既豬扒。芒果紅茶係個朋友介紹我飲既，都幾重芒果味。雖然有小小人造芒果味，但又唔會無哂茶味。重要既係，呢個飲品係跟餐，都算係咁啦。整體上都普通啦，不過服務唔太積極。唔知有無下次啦，始終都係覺得野食唔係特別好食。又唔算話太平。