潮福蒸氣石鍋 (已結業)

一行十人，每人$298所謂海鮮任食2小時30分鐘（另加醬料錢、加一）。之前在青衣分店食過三次好滿意，因這間近阿媽家才大膽試試，然後發覺做人都係唔好咁大膽。先旨聲明，海鮮是新鮮美味，只是平日八點半鐘已叫乜無乜，真係講唔通。一坐低order兩款燉湯，5分鐘後話燉湯只剩一款，再10分鐘後話只剩四碗，其餘六位「特登」做個龍蝦湯畀我地，點知出黎係蝦殼水埋個薄獻，各位試一啖立即放低叫佢攞走。樓面同廚房溝通差到無朋友。然後海鮮，八點半已無美國石蠔，九點半無哂竹蔗水，無紅棗糕，話因為太好生意喎。其實咁多野無，係咪應該停咗個任食餐？或者一早同客人說明，再由客人決定任食定散嗌？另奉勸大家，要早落單。嗰位黑衫女部長，死都唔肯幫我落任食食物嘅單，話海鮮食到大半落單就得，好快出黎。點知食完海鮮有20分鐘白等無野蒸，藉口係突然好多客。總之真係特登搭車入青衣都唔會再幫襯喱間分店。我老婆試過尖沙咀嗰間亦發現招呼差、裝修廢、價錢唔同。厚福集團睇黎唔識管理。