Bugis@叻沙・海南雞飯 (已結業)

其實V city啲嘢食不嬲都好貴，如果想食平，我諗依家算係最抵食， 一個lunch set 60蚊到。雖然佢有好多選擇，但係我哋不約而同都揀咗印尼炒飯，一共叫咗5個。印尼炒飯個色好深色但係就唔算話好有味，不過佢個沙嗲雞肉同埋蝦嘅味就好夠，可以補救下，特別要讚嘅係嗰個蝦肉，幾彈牙，好食！正嘅就係佢可以揀黑糖珍珠豆漿，好好飲，不過對於唔鍾意甜野嘅我來講就真係有少少過甜。朋友就叫咗個咖喱牛腩椰香飯，咖喱真係幾唔錯，有少少似日式咖喱嘅味道。有兩個朋友叫咗蜜汁叉燒大碗飯，感覺真係幾豐富，而且只係$52，仲有嘢飲。上一次我食咗佢嗰個咖喱魚柳，真係一啲都唔好食，所以都唔再咁叫大碗飯。不過朋友食完蜜汁叉燒就覺得唔錯嘅，如果想慳錢就值得一試啦！