阿媽正宗海南鷄 (已結業)

今晚去紅磡整嘢，順便食個晚飯，行過寶其利街見到一間《阿媽正宗海南鷄》嘅小館，作為一個海南鷄粉絲，梗要入去試吓喇。店舖面積唔算大，街坊小店格局，約莫有八九張細枱，地方都算乾淨企理。餐牌選擇唔多，主打賣鷄飯，除咗海南鷄之外，仲有沙羗鷄、鹽水鷄、口水鷄同葱油鷄，另外仲有豬扒飯同藕餅飯。我揀咗海南鷄脾飯(HK$49),例湯先上，真係好清嘅鷄湯，呷一口，咦! 有驚喜! 點解有藥材味嘅，問侍應姐姐，原來佢哋落咗川芎、杞子同紅棗嚟煲，唔怪之得喇。我個人就覺得幾特别，幾好味。跟住靚靚海南鷄脾飯上枱，呢個心形嘅鷄油飯認真盞鬼，飯入面加咗香茅都幾香，不過就乾身同硬咗一啲。好在啲海南雞就幾得，首先份量夠足，件件皮薄嫩滑，配埋三式醬油，真係食得幾滋味。我仲加多HK$12，叫多碟鷄湯浸菜苗，咁有肉有菜，就食得健康啦。今次試過呢度啲鷄真係有番咁上下，下次再嚟就會試吓唔同嘅炮製方式，睇吓滋味如何。