饕鍋物 (已結業)

之前經過見到新開張已經想來試，琴日終於有機會同男友來試試。天氣炎熱，走來打邊爐，熱上加熱😅😅來到店員會介紹menu, 188一位，無加一。湯底可以揀一款或兩款鴛鴦。我哋揀咗三杯雞同鴨血麻辣湯。三杯雞湯都唔錯，雞肉幾好味。但鴨血湯就⋯⋯本身見係麻辣先揀，結果食第一啖就有種講唔出嘅苦味。辣就有辣味，不過完全無香味。結果我哋放棄咗一邊湯底。😅🤦🏻‍♀️醬料都算多選擇。不過我哋揀嘅湯底都比較濃味，基本上都無點過醬汁。下次應該揀個清淡啲嘅。另外每人可揀一款肉類，唔係任食。我哋兩個人所以揀咗豬肉片同牛肉。擺盤幾靚，食材睇落都算新鮮。一開始會上曬蔬菜同海鮮各一盤，之後可以再點。某啲食物需要另加錢，基本上算係半放題。188套餐包一杯特飲，之後每人加十蚊可以任飲。紫色嘅係潘多拉盒子，味道唔錯，見到好多人點。台式小食可無限添加，一開始都會上一碟咩都有啲。食咗想食可以再點。另可揀主食，每人揀一款。我哋揀咗擔仔麵同魯肉飯。兩款味道都唔錯，肉燥幾好味，頗有台灣的風味。最後以甜品結尾，都係每人一款。黑糖雜錦芋圓＆雲尼拿雪糕。芋圓幾好味，啱曬所謂嘅“像皮”喜愛者。不過下面嘅冰唔係沙冰，而係凍到一嚿嚿。🤦🏻‍♀️🤦🏻‍♀️