手作鮮芋站 (已結業)

同朋友嚟九龍寨城公園行下，路經九龍城廣場，見到對面有間芋圓甜品外賣店，店舖主打芋泥、芋圓甜品，另外亦有一系列台式飲料、小食及吐司等供應。朋友係芋圓控，第一時間揀咗份芋圓大滿足。芋圓大滿足 ($48)  用料好豐富，一客已經有齊三色芋圓、仙草、大芋泥同芋香汁。芋圓全人手製作，口感Q彈；仙草軟嫩滑溜，加上綿密芋泥，多重享受！芋泥肉鬆吐司 ($42)  吐司賣相非常吸睛，麵包夾著滿滿餡料，令人食指大動！芋泥自家製，軟熟綿滑；肉鬆鹹香惹味，配烤至微脆嘅多士享用，相當美味。芒果芋圓鮮牛奶 ($38)  成品真材實料，用上新鮮芒果肉、牛奶及芋圓製作。芋圓大小適中，質感煙韌有咬口，芒果打成蓉，入口幼滑甜美；把材料用力拌匀，與牛奶完美融合，味道更有層次。養生蜂蜜生薑茶 ($26)  生薑茶熱辣辣，飲落好重薑味，加上微甜嘅蜂蜜，滋潤養生。