一起食堂 (域多利皇后街)

營業中

休息中

台灣真係讓人有種慢活步調嘅生活感覺，所以喺繁忙嘅工作天，台灣菜或者可以調整一吓你嘅生活節奏。而作為中環嘅OL，呢間主打台灣菜嘅一起食堂就成為我哋近排嘅飯堂，食物高質，值得推介。麻辣香滷豬耳朵豬耳切得比較厚身，特別爽脆，麻辣度適中，唔會覺得辣到食唔到。吉列炸蠔即炸嘅吉列生蠔，金金黃黃，外脆內軟，入面勁juicy！花雕麻油雞湯麵花雕酒用木勺分開上，可以按個人喜好調整分量。湯入面有杞子龍眼紅棗等食材，所以湯底十分香濃。第一次食用烏冬做麵底嘅花雕麻油雞湯麵，比想像中夾！雞件係用咗無骨嘅鹽水雞卷，肉質嫩滑但唔肥，唔會令到成碗湯都係雞油。三杯雞飯雞肉無骨，係可以一啖一舊嘅啖啖肉。醬汁偏甜，不過撈飯食一流！愛玉鳳梨綠茶呢杯飲品偏甜，鳳梨味道好鮮明。仙草奶茶唔鍾意飲太甜嘅可以揀無糖，會飲到香濃茶味。