聚點 (已結業)

今日同完幾個朋友係尖沙咀睇完戲就去搵野食。行下行下去到河內道見到有好多酒吧，但聽日要返工，我地就揀左呢間中菜館去食晚餐，出面貼左好多menu，價錢好合理，又多選擇。入面就好光猛，坐得都算幾舒服。我地叫左六個主菜，好快例湯就上左先，飲得出係真材實料，無味精嘅感覺。半隻聚香雞連埋三個醬汁就上枱，隻雞好滑，半隻都好夠分量，加埋個汁就更加好。金沙鮮魷上枱果時我地都嘩左出聲，好大碟，同埋好金黃。熱辣辣咁食好正。之後就到柚子骨啦，開頭以為係橙橙地色，不過原來偏紅色多啲。食落好香柚子味，啲骨都好肉食。好快青芥末牛柳粒都嚟到啦，真係好青色好大碟，呢碟好啱鐘意食wasabi嘅朋友，食完好醒神。錦江海鮮豆腐煲同魚香茄子煲就最後上埋枱，兩個煲都熱辣辣，香到格離枱都聞到，份量都好大，好香口，送飯一流。所以最後我地加左偽鮮蝦福建炒飯，好多蝦，四個人都分到碗半兩碗，撈埋啲餸食好正！咁樣食完一個人都係百七蚊倒，係尖沙咀有咁嘅質素，份量同價錢，真係無得輸！推薦大家嚟試下！