生記茶餐廳 (已結業)

男友放工見到話想食，第一次去，去到時6點幾，一去到冇人招呼但見到9成坐滿，覺得好奇怪，等左一陣見到老闆娘先知原來樓面得老闆娘一個人忙，唔洗排隊但要搭枱。叫左蟹粥，再喺老闆娘推薦下叫左蠔仔蒸粉包。蠔仔蒸粉包($58)味道唔錯，蠔仔大粒飽滿又新鮮，粉皮夠薄夠滑，但就係太薄一夾就散晒啲蠔仔出黎，分開食。 蟹粥($128)啲羔有啲生，但蟹肉夠鮮甜夠嫩滑，一上枱成窩仲要滾住上，夠晒熱，但食食下食到成舊未融晒既味精就完全明白晒點解啲蟹咁鮮甜，同埋點解啲羔仲依附喺蟹上面但啲粥會係金黃色，而且粥底都唔夠軟綿，可能叫飯會仲好。