影片
更多
2019-11-24
8059 瀏覽
久聞天香樓大名，亦舒同蔡瀾都曾經講過食中菜必食天香樓，或是全香港最好嘅杭州菜江浙菜一定係天香樓云云，早於二、三十年前已經係香港富豪飯堂，小女子尚年青，之前未有來過，剛好有朋友叫食飯，終於有機會黎試試，應該係一世人唯一一次，以後就算有人請都唔會再黎。 首先，我最唔鐘意餐牌係手寫價錢，即係話個價係海鮮價，呢個非常不合理，本身如果係時令食物例如大閘蟹之類，你手寫無問題，但我就唔係好明為咩連個東坡肉都係手寫銀碼。成個感覺就好唔老實，有錢黎食，唔代表要俾你搵笨。 再來，朋友之前係有光顧過，今次要就佢時間，要等佢外語課落堂先食，咁佢訂檯係晚上9：30，我哋成班朋友不虞有詐，不過都因為怕太夜早左到，點知坐低無耐侍應就同我哋講9：30 係 last order， 佢地廚房收工，然後話佢地鋪頭係收10 點。 當堂呆一呆，如果係咁，點解仲接受 9:30 訂位？ 係咪整古人？ 唔緊要，咁叫餸係住等啦，朋友一打開餐牌，即時放低話唔敢叫，因為價錢貴得不合理，我因為心知呢度大約係咩價位，大家睇完一輪都無人想叫就由我發辦，本身想多叫幾款所以打算叫細碟
首先，我最唔鐘意餐牌係手寫價錢，即係話個價係海鮮價，呢個非常不合理，本身如果係時令食物例如大閘蟹之類，你手寫無問題，但我就唔係好明為咩連個東坡肉都係手寫銀碼。
成個感覺就好唔老實，有錢黎食，唔代表要俾你搵笨。
再來，朋友之前係有光顧過，今次要就佢時間，要等佢外語課落堂先食，咁佢訂檯係晚上9：30，我哋成班朋友不虞有詐，不過都因為怕太夜早左到，點知坐低無耐侍應就同我哋講9：30 係 last order， 佢地廚房收工，然後話佢地鋪頭係收10 點。 當堂呆一呆，如果係咁，點解仲接受 9:30 訂位？ 係咪整古人？
唔緊要，咁叫餸係住等啦，朋友一打開餐牌，即時放低話唔敢叫，因為價錢貴得不合理，我因為心知呢度大約係咩價位，大家睇完一輪都無人想叫就由我發辦，本身想多叫幾款所以打算叫細碟
（係，佢大部份菜色都有分大中小三個價錢），但侍應響呢個時候提醒我，每位有最低消費$700, 我咁樣叫係唔會食到數，最後都係收足錢，我地7個人，即係未計加一都要＄4900，所以我都唔想再諗，叫佢將份量變成中碼。
最後我哋叫咗：（我唔 post 相，因為食到第 3 度已經無心機影）
三拚冷盤（海蜇、醬鴨、鴨舌）＄328
海蜇有麻油香，不錯，鴨舌一味咸，完全食唔到任何味道，醬鴨咸到連用黎送酒都覺得係錯！
龍井蝦仁（小）＄388
完全食唔到龍井嘅清香，佢只係響蝦仁上面灑咗十幾條茶葉上去，蝦亦無河鮮味，最後要靠蟹醋去提味先食得完，咁我叫呢個菜嘅目的係為咩呢？
糖醋排骨＄298
正常發揮，但只需用一半價錢，我響任何一間上海菜館都食到同樣味道。
東坡肉＄288
一盅有4舊，食唔到入口即化嘅豬肉香，我朋友食完評語係：「舊瘦肉好鞋」
你咩時候會用「瘦肉（發音：玉）黎形容一舊豬肉？
係煲完湯剩低果d 湯渣呀！大佬！
辣子雞丁＄308
完全食唔到辣味，只係食到一碟好多芡汁，一粒粒好鞋口嘅雞肉
炒三鮮＄298
我唔知入面有邊三鮮，因為果碟嘢上檯時，成個賣相同廚餘無咩分別，我本人完全提不起意慾去夾黎食。只知一定無牛骨髓因為侍應話佢地無牛賣。
椒鹽鱔背＄478
成晚食過最好就係呢一碟，真正無骨，夠熱，香口。
蟹粉豆苗＄1160
千幾蚊食一個蟹粉豆苗值唔值就真係見仁見智，蟹粉份量係算多，豆苗亦炒得非常好，唔油，鮮甜，但呢個價錢就真係有點兒那個。
蟹粉拌麵＄428 （叫咗 3 碗 Share, 合共 ＄1284）
蟹粉分開一碟上，份量不多不少，麵好食，但唔會好食到嘩一聲。
計埋一支酒嘅開瓶費，另外叫咗一個白飯，茶芥連加一，成餐飯盛惠＄5951
錢都算，最慘係食物質素大多都非常一般，一般到我去其他中價上海菜館都食到呢個水準，你話食環境食氣氛咩？
佢鋪頭老舊得黎毫無特式，單就只係一個舊字，而最大件事係服務。
全晚只有一開始招呼我哋，幫我哋落單果位係侍應係有禮貌，一開始講過喇，負責訂檯吹雞食飯果位朋友，9：30 先落堂，趕到黎已經10點，我見到鋪頭真係即刻較暗晒d燈光，有侍應出門口收閘（當時店內連我哋仲有至少4檯客），朋友到之前，另一個阿叔侍應加一個阿姐，已經不停叫我哋打包檯上食物，話凍咗唔好食，問佢可唔可以幫手熱一熱個蟹粉，或俾碗熱白飯我朋友，佢哋就話廚房收工走埋喇。
到朋友趕到黎，佢都唔計較，檯上有咩都食埋先，果個阿叔不停響隔離叫佢唔好食，叫佢打包，然後不停收我哋檯上啲碟，之後又話無車返屋企呀，好慘呀，然後，成個收碗碟用嘅銀盤放上我哋檯面，去到呢個地步，我哋都唔想再講，叫佢幫手打包2－3個菜走人。
一路pack 果陣，仲俾我另一個朋友聽到佢哋講：「蝕咗半個鐘」。
最後幾檯客一齊走果個畫面，簡直同電視見到嫖客去一樓一被差佬捉到，一個跟一個咁被人推出去無咩分別。
收呢個價錢，食物質素對唔住佢個價，服務差，環境一般，7個人黎食，埋單位位＄1200，我諗響呢個時勢有大把更好選擇。
呢種曾經風光嘅老牌食店，去到今時今日，同一個已經人老珠黃但仍死撐尚餘三分姿色唔肯面對現實嘅女子一樣，上厚粉遮掩倦顏，露出一口煙屎牙猶自故作風情，旁人見到真相，只會更添厭惡。
張貼