吉吉點 (已結業)

原本開開心心，有期望地去試食點心，點知一踏入門口，被一聲大聲而無尾音嘅男聲叫停——坐呢度，只見當時12點只有兩張枱人客，兩人枱都多選擇，不過為免爭嗌都照坐低，唔夠一秒又係一聲——飲咩茶，略為考慮就即刻再問飲咩茶，可能呢啲叫效率啦。當剔完點心心後就同朋友傾下計，但啲員工不停高談闊論，大大聲聲，令人感到煩擾，幾艱難先過左25分鐘，一樣點心都未上，見遲過我地嘅客都有野食，雖然覺得奇怪，但都不好意思吹單，只好再等一下，直至等到29分鐘先有野食。嚟嘅一碟蝦餃，皮係薄，但塊皮偏爛同散左，味道就一般。馬拉糕細細舊，味道尚可，但原來係今餐算最好味。另一碟生竹牛肉睇得出係即蒸，算有heart，不過偏實，扣小小分。等到39分鐘，係最後嚟嘅手工布拉腸粉終於到，一放入口，竟然係微暖而且一啲都唔滑，於是向剛才招呼我地嘅口罩男表示，佢竟然無反應，亦無解釋，於是我地亦都唔再繼續食，埋單算，以後又可以唔洗再幫襯。整體嚟講，作為一間點心專門店嘅出品，只可以講係一般水準，服務就超有改善空間，如果喺附近都可以幫襯，遠就唔好專登去。