大邊爐火鍋店

營業中

休息中

7月份仲係我嘅生日月，又有朋友約食生日飯。雖然外面三十幾度，但一樣有人提議打邊爐。不過既然係室內涼住冷氣打，咁又真係無乜所謂嘅。如果郊外BBQ就真係咪搞我啦。朋友揀左喺九龍城呢間大邊爐火鍋店，門面非常簡潔，而且係樓上鋪，需行上一層樓梯。一班人最好就係叫套餐，唔駛慢慢諗。當然唔夠嘅話仲可以加其他野啦，呢度火鍋配料選擇都幾多，而且價錢唔算貴啊。湯底我地揀左香茜皮蛋，原因好簡單，就係貪佢有莞茜夠下火嘛。人就係咁矛盾，又要打邊爐又要怕熱氣喎。哈哈先黎海鮮刺身拼盤，有象拔蚌、帶子、鱆紅魚等等，其中象拔蚌當刺身食又得、放入火鍋淥一淥又得，味道都相當鮮甜。而家四圍都叫安格斯牛肉，連老麥都有得食啦，所以想食上等牛肉，一定要試下呢個Prime Grade質素嘅安格斯了。要達到呢個級數，除左牛隻本身血統外，油花紋理同脂肪比例都要達到一定標準。所以供應量一定唔會多。而且淥嘅時間要留意一下，千祈唔好淥太耐，咁就食到佢嘅鮮嫩，又唔會「鞋」口啦。黑松露翠玉餃、沙葛爽爽餃、水餃、魚皮餃加埋就係大邊爐4色餃啦。4款都各有特式，餡料又夠新鮮。另外點了自制墨魚滑同自制蝦滑，兩款都食到墨魚同蝦本身的鮮甜味，而且都彈牙爽口。