逸 壽司 (已結業)

繼續掛住日本，只好讓味覺遊日本。今日比較多嘢做，晏左少少食lunch，要食d精緻d嘅慰勞吓自己。諗起亞士厘道有間壽司店，有時經過見到細細間咁，幾有日本feel，今日過晒lunch hour 去應該唔多人掛。果然只得1、2枱客，啱晒我想靜靜地抖吓食餐好嘅🥰自選12件壽司都係$198，選左幾件之後，選擇困難症發作，見店面無咩人，即管問吓壽司師傅有咩推介，師傅很好人，立即給我介紹，但我真係唔多識去揀，叫師傅幫我決定(突然間食套餐變左食Omakase😅) 真心要讚呢度嘅工作人員，無論壽司師傅或者侍應都非常友善，態度親切，剩係呢點都足以令我再次幫襯。講返壽司，每一件都係師傅用心、細心處理嘅手握壽司，最後12件上枱嘅壽司包括吞拿魚腩壽司、吞拿魚壽司(赤身)、深海池魚壽司、三文魚腩壽司、䓤吞拿魚蓉軍艦、蟹籽軍艦、金線鯛壽司、池魚壽司、真鯛壽司、金目鯛壽司、赤蝦壽司、最後係帶子壽司，雖然部份係由壽司師傅幫我發板，但完全唔會係揀晒d平價壽司俾我，每一件都非常、非常美味。壽司飯見到粒粒分明，但同時由於師傅力度掌握得好，無論我點夾，舊飯都唔會散開，仲有飯嘅size非常適中，一口一啖，唔洗張大嘴巴，唔會失儀。