宮保 (已結業)

今日lunch諗唔到食咩餐廳好, 所以打算去登龍街邊行邊搵。行到差唔多盡頭, 見到呢間宮保, 見到D店員係門口都幾落力介紹, 見到門口貼住一張「全單7折」, 好似幾抵食, 終是就入左去試試。(但原來係叫主餐牌入面既食物先有7折。) 餐廳入面佈置唔錯, 以深木色做主調, 而天花掛左好多枝新加坡🇸🇬既旗幟, 幾特別。秘製海南雞配油飯 ($79)海南雞既皮薄肉嫩, 唔算肥膩, 亦唔鞋口。雞肉帶有好香既雞味, 而且唔會痂緊D雞骨, 好易食! 不過用黎沾雞的醬汁唔係上枱時一併附上, 而係店員將3枝醬汁放係枱面, 由我自己隨意擠落碟中… 無一個醬油碟去裝住D醬, 感覺有少少奇怪。再講個飯, 第一眼望見個飯就覺得煮得唔錯, 唔會太濕或者太油。食落去既味道屬一般, 未算係我食過最好味既油飯, 因為佢D雞油唔夠香, 所以味道上打左少少折扣。熱奶茶跟餐免費加配熱飲, 正常港式奶茶味道, 無咩特別。